Pablo Casanueva

Entama la so rellacción cola imaxe al traviés de la pintura. Sigue cola fotografía y desendolca nel cine. Dióse a conocer nel 2013 col estrenu de Bernabé, el so primer llargumetraxe y el primeru en llingua asturiana, col qu’algamó un gran éxitu de públicu y más de 30 proyeiciones destacando’l Festival Internacional de Cine de Xixón, el Festival Cine Europa (Santiago), el Festival Intercélticu de Lorient (Bretaña) y el Centru Niemeyer. Una película fecha ensin grandes medios téunicos y gracies a una producción collaborativa. Darréu, estudia Comunicación Audiovisual na Universidá de Burgos y na Universidá del País Vascu en Bilbao. 

El so discursu artísticu básase na memoria, familiar y coleutiva,  y nel retratu identitariu de la realidá asturiana. Ente les sos obres destaquen: La sele construcción de la memoria (2017) y Escontra la casualidad (2018), ambes estrenaes nel Festival Internacional de Cine de Xixón nel 2018; el cortumetraxe musical Mensaxe pa la mocedá del Imperiu (2019), basáu na obra de Xaime Martínez (Premiu Nacional de Poesía Joven 2019) y presentáu nel Festival Mediu Güeyu; Conserveres (2017), videocreación seleicionada nel festival LAN de Bilbao; Al final de este viaje (2017), cortumetraxe galardonáu col Premiu Interrail FICX 55; los ducumentales El Cobayu (2018) y 50 años de Tito Bustillo. La memoria de la Cueva la Cerezal (2018), producíu pola Conseyería d’Educación y Cultura y codirixíu con Dolores Álvarez; la videocreación Llaberintu (2019) presentada nel FICX; los documentales NOS (2019) y Filme urxente sobre La Plaza (2018); o’l so primer cortumetraxe Tempus (2012), tamién presentáu nel FICX. 

Como fotógrafu presentó dos series individuales: Xente (2013) y Cierre (2017); y la obra coleutiva Ribadesella en 4 (2018). Tien dirixíos varios videoclips pa grupos como Los Berrones, Héctor Braga, Almatrampa o Synesthesia.