Pablo Casanueva

80 años ensin memoria

Xornaes sobre memoria histórica en Ribeseya
N’avientu de 2018 lleváronse a cabu les xornaes 80 años ensin memoria col enfotu de recordar y recuperar la memoria de 38 riosellanos asesinaos nel 1938 pola Dictadura Franquista. L’añu con más víctimes nel conceyu d’un total de 74 persones asesinaes ente 1937 y 1943. L’Asociación por la Recuperación de la Memoria Histórica (ARMH) xuntu a Pablo Casanueva organizaron estes xornaes cola idega de recuperar la memoria democrática, dignificar a les víctimes y cubrir el vacíu esistente nesti aspeutu. 
Na Cai Manuel Fernández Juncos espúsose una selección de fotografíes feches darréu de la entrada de les tropes sublevaes en Ribeseya, en setiembre de 1937.  Trátanse de fotografíes dixitalizaes pola Biblioteca Dixital Hispánica y realizaes pol conocíu fotógrafu Campúa. Munches d’elles desconocíes y ensin asoleyar hasta’l momentu. Colocáronse na cai col fin d’espardir la temática más allá de la Sala d’Esposiciones y arreyar a los riosellanos.
Lleváronse a cabu dos charres na Casa la Cultura impartíes por Arantxa Margolles y Alejandro Fernández. Margolles, historiadora, arqueóloga y divulgadora en medios como El Comercio, RPA y TPA, así como presidenta de la ARMH n’Asturies, faló el vienres 14 de “La memoria de los güesos”. Per otru llau, el historiador cangués y collaborador d’El Comercio, Alejandro Fernández faló de la memoria histórica nel Conceyu Ribeseya y punxo en rellación los cortumetraxes La sele construcción de la memoria y Escontra la casualidá de Pablo Casanueva. Dambos trabayos, qu’ aborden la memoria familiar del director en rellación a la guerra civil y la posguerra, foron proyectaos durante la charra.
Les actividaes tuvieron bona acoyida de públicu y foron varies les persones qu’aportaron nuevos datos entornu a la represión franquista nel conceyu. Ayudando a completar esi vaciu históricu esistente.