L’entamu d’El bueno, el feo y el malo (1966) ye una secuencia na que tres homes tan a piques de, aparentemente, retase en duelu. Los dos primeros planos son de Frank Braña y Saturno Cerra: dos asturianos. Les miraes, el soníu y la tensión que va marcar tola película yá ta presente nesti aniciu. Nun se trata de nengún duelu. Los tres personaxes entren d’una patada na cantina. Darréu, otru home sal de l’interior rompiendo una ventana. La imaxe conxélase, un grafismu indica “il brutto” y entama a sonar el leitmotiv musical de la película. Una corta melodía qu’anguañu dientro de la cultura popular yá sintetiza tol universu western. Podemos llegar a dicir qu’esa melodía ye en sí mesma el western. Por tantu, podemos poner poética y dicir tamién que’l western entama cuando dos asturianos atraquen un chigre. Tres planos dempués apaecíen muertos. Yera la so especialidá. Dafechu, Frank Braña tenía muertu alrodiu de 164 vegaes nel cine. 

Francisco Braña Pérez nació en La Puela en 1934 y Saturno Cerra Pendás en Sebreñu, Ribeseya en 1924. Con Saturno eché dalgunes parrafaes y ta retratáu na coleición Xente. Andaba siempres con sombreru y cola chulería d’un cowboy, heriedu de los sos papeles. Dicíame él: “¿Y tú qué, fotografín?”