Busco lo político nes semeyes del archivu familiar. Tópolo no tapecío y no discreto, ehí ta. Foi verdá. Les imaxes enfréntense a la desmemoria y al poder. Sigo la investigación tratando de reconstruyir los percorríos políticos de Los Luna buscando nos archivos públicos y nes buelgues que dexaron. El mieu [el refuxu], el duelu [la radiografía del dolor], la esperanza [el compromisu políticu]: ehí tán.

Los Luna foron desestructuraos a consecuencia de los sos posicionamientos políticos demientres la guerra: Pepe, l’hermanu mayor, exilióse en Francia cola so familia; María y la so fiya Chabela, mio güela y mio bisgüela, refuxáronse en Cataluña; a Ramón fusílenlu nel Cementeriu d’Uviéu; Manuela mandó los sos fiyos a Francia como guah.es de la guerra, el so maríu tuvo na cárcel; Manolo tuvo cinco años presu en Galicia y llueu nun batallón de trabayadores.

Investigar al traviés de la fotografía y del cine. Buscar nel pasáu un anclaxe ante’l presente y el futuru. Facer grande lo pequeño, dar espaciu a lo escaecío, que nos atraviesa y nos configura. Llevalo too ello al filme y a la sala. Dexar ver los sos llugares de pasu [y los míos] restaurando la memoria de lo qu’algún día pasó y foi pensao, como quien restaura les pintures d’una ilesia quemada.