Ente los años 2012 y 2015 percorrí el mio conceyu tratando de topar rasgos comunes (históricos, llingüísticos, identitarios) y caltenelos visualmente. Yera la fotografía la puerte d’entrada a esos alcuentros que me permitieron sentir, y rexistrar dalgunes veces, la memoria d’una xeneración ente dos mundos. Falé con esta xente y cuntáronme la so vida con pallabres vieyes. Dexáronme conocer los sos archivos fotográficos, los sos espacios y les sos xeres. Retratélos nel so espaciu, ensin intervenir, ensin illuminar. Una búsqueda documental, buscando un retratu honráu y xustu. Per otru llau, una mirada propia y atenta a les formes. Fale-yos na so llingua. Falé con elles ensin procuru investigador primando la naturalidá y cercanía na conversación.

Torno agora a estes imáxenes pa da-yos nueva forma ya incorporo non solo la fotografía elexida, sinón les que tamién formaron parte del procesu fotográficu del retratu. Nun edito les pruebes, el disparu orixinal de la cámara. Trato con ello de topar motivos visuales recurrentes y aportar movimientu. Nesti procesu de revisión alcuentro tamién dalgunes grabaciones visuales y sonores. Nes primeres dilato’l tiempu y quíto-yos el color, como un suañu nel que les llabores y la xente yá son pantasmes. Nes segundes, les voces amontónense na memoria y dexen, de xemes en cuando, pallabres qu’evoquen y construyen el pasáu (la guerra, la represión, el trabayu, la historia). El testimoniu d’ecos de vides cada vez más llonxanes.

Nel mio procesu creativu doime cuenta que siempres torno a estes imáxenes y relatos que foron, y entovía son, pegoyu míu y de nueso.