Ye cineasta y artista visual graduáu en Comunicación Audiovisual pola Universidá de Burgos con un añu SICUE na Universidá del País Vascu en Bilbao. Entama la so rellación cola imaxe al traviés de la pintura, sigue cola fotografía y desendolca nel cine. Los sos temes recurrentes son la memoria, la identidá, los espacios y la política. Les sos ferramientes tan lligaes a la memoria oral, l’archivu, la fotografía y el paisaxe.

De la so obra rescampla’l llargumetraxe Luna (2024) que parte d’un procesu d’investigación na memoria política familiar al que tamién pertenecen los curtiumetraxes: La sele construcción de la memoria (2018) y Escontra la casualidá (2018) amás de la exposición La imaxe, lo tapecío (2024). Dende la mirada a la memoria colectiva alcuéntrase’l curtiumetraxe 8 filmes sobre la guerra (2021, Premiu Llaboral Cinemateca FICX). Destaca tamién el proyectu fotográficu Xente (2012-2023) y la web serie El Cobayu (2018).

Tien participáu en formaciones n’espacios como la Escuela Internacional de Cine y TV de Cuba (Gran Taller Filmar en Cuba con Gianfranco Rosi) o Academia FICX y en llaboratorios cinematográficos como’l FilmLab (Premiu Meyor Proyectu) o FICX Pro. Foi artista residente en LABoral Centro de Arte y El Palacio. 

La so obra cinematográfica pudo vese en festivales y espacios como’l Festival Internacional de Cine de Xixón,  Punto de Vista Festival Internacional de Cine Documental de Navarra, Clermont-Ferrand Festival Internacional de Cortometrajes (Francia), Festival Cine Europa (Santiago de Compostela), LAN Festival Audiovisual Obrero (Bilbao), SACO Semana del Audiovisual Contemporáneo de Oviedo, Aguilar Film Festival, Avilés Acción Certamen Nacional de Cortometrajes, Babel Film Festival (Cagliari, Italia), La Pinochera Semana de Cine Rural (Tenerife, Islas Canarias), Centro Azkuna Zentroa Alhóndiga (Bilbao) o’l Centro Cultural Europeo Eureka (Santander).

La so obra plástica formó parte de la Muestra de Artes Plástiques del Principáu d’Asturies (2022) y tien pasáu per espacios como LABoral Centro de Arte (Xixón), Sala Borrón (Uviéu), Factoría Cultural d’Avilés, Antigua Rula (Xixón), Antiguu Institutu (Xixón), Muséu Etnográficu del Oriente d’Asturias (Porrúa), Festival Intercélticu de Lorient (Bretaña, Francia) o’l Valey Centru Cultural (Castrillón). 

Desarrolla tamién otru tipu de pieces más venceyaes a la videocreación y l’ensayu como Llaberintu (2019), Tres díis a la ventana (2017), Conserveres (2017) o Al final de este viaje (2017 – Premiu Interrarril 55 FICX). Tien dirixíos los curtiumetraxes musicales Euforia (2023) cola cantante asturalemana Bárbara Cuesta y Mensaxe pa la mocedá del Imperiu col poeta, escritor y cantante Xaime Martínez. Tamién forma parte de dos obres de teatru cola compañía Higiénico Papel Teatro: Cuarteto (Premiu Xovellanos Producción Escénica 2021) y Yo la quería (2023). Desarrolla tamién xeres de trabayu campu y defensa del patrimoniu cultural.