N’Abéu alcuéntrase l’antiguu cine-teatru de la parroquia de San Esteban. Conserva la estructura orixinal col es

N’Abéu alcuéntrase l’antiguu cine-teatru de la parroquia de San Esteban. Conserva la estructura orixinal col escenariu, la taquilla y la sala de proyeición. Tuvo en funcionamientu hasta 1967. Na so programación tamién teníen sitiu les  actuaciones musicales. El cura Manuel Álvarez Miranda foi l’impulsor d’esti espaciu y l’ellaborador de los ellementos d’escayola que lu decoren. Teníen un montaxe sonoru que permitía que la voz de la persona que tuviere falando al micrófonu llegara a un altavoz colocáu nel campanariu. Los del llugar alcuérdense de cómo’l Presi sonó en tola redolada al traviés d’esti sistema. 

Cunta tamién con un pasadizu que comunica l’escenariu cola sala de proyeición. Per ellí pasaben los actores y actrices del pueblu mazcaritaos pa que nun los reconocieren al actuar. Con tou ello, el Cine Parroquial de San Esteban foi tamién ún de los primeros llugares d’Asturies onde se vió la televisión. Angelín el de les Arradios (el so mote dexa ver la so pericia pa les cuestiones técniques de los medios de comunicación) consiguió recibir la señal de los Altos Hornos de Bilbao con una antena puesta nel campanariu. L’espaciu bien merez un cuidáu. Nun sé l’interés que puede tener La Ilesia, propietaria del llugar, de la so puesta en valor. 

La gran mayoría de los terrenos de la parroquia de San Esteban pertenecíen a Marisol Rato y Bernaldo de Quirós. Güei pertenecen a los descendientes. N’Abéu la gran mayoría de les propiedaes concentrense en otres poques families vinculaes dende xeneraciones col poder del estáu.

Les semeyes son de fai unos años nuna visita con Pablo A. Quiroga.