Pablo Casanueva

Esto tuvo que facese fai 30 años - Pablo Casanueva

«Esto tuvo que facese fai 30 años»

Abril 2021

Parajón trabayó 22 años en Solvay, de guaḥe primero y llueu de picador. La tarde na que les voluntaries de la ARMH mos acercamos a Espinera Parajón tenía una vaca de partu. Entrugónos con sorna si entendíamos daqué de vaques. Quedó la so muyer al curiáu de la vaca y fuimos hasta La Boroñada. 

La finca ta a unos kilómetros de la so casa pero bastante más cerca pelos caleyos. Cuando taba cayendo’l Frente garraron na Estación de Lieres a un milicianu santanderín. Agora pasa l’autopista pol mediu y paez que la distancia ye grande, daquella taba más cerca. Entrugamos, ¿yeren falanxistas los que lu garraron? Home caro, dos, hasta la médula.

Traxéronlu a la finca y pegaron-y dos tiros. Un vecín que taba dimiendo castañes marchó por nun lo ver. Pela tardi, Camilo, el padre de Parajón, vieno a buscar les vaques que tenía nel prau. Topóse col vecín que tuviera de mañana y acabaron d’enterrar al santanderín.

Parajón sintió la hestoria a so pá, que morrió cuando él tenía 15 años. Retúvola tola vida y sabe perfectamente ónde ta’l cuerpu. Quier sacar d’ellí a esi paisano. Entrúganos si sabemos más o menos cuándo lo podremos facer, esto tuvo que facese fai 30 años. Nun se sabe’l nome del asesináu, naide lu reclamo enxamás y tampocu sabemos de xuru si ye de Santander. ¿Qué me tas faciendo un semeyu? dizme cuando lu retrato, ¿sabes qué ye un semeyu? Agora hai que falar asturianu. 

Ye un aliendu grande conocer a Parajón.