En 1968 descubriéronse les pintures rupestres de la Cueva de Tito Bustillo. Renomaron el llugar en homenaxe a unu de los descubridores que falleciera pocos díes dempués. El topónimu tradicional del llugar nun ye El Pozu’l Ramu como figura oficialmente, sinon La Cueva la Cerezal. Falando con varios vecinos y vecines d’Ardines treslladáronme el so malestar sobre esta cuestión. 

El testimoniu de Matilde Álvarez Rosete a los sos 93 años diz con firmeza que pol llugar per onde entraron a l’actual Tito Bustillo llamábase La Cueva la Cerezal porque tenía dichu árbol a la entrada. El Pozu’l Ramu alcuéntrase a pocos metros. Matilde recuerda qu’una vegada tuvieren que sacar una xata (y hasta un toru) que cayera’l pozu. Facíenlo per otra cueva cercana cola que comunica y que con eficacia llingüística llamaben la Cueva’l Pozu’l Ramu, que nada nun tien que ver col descubrimientu. Dafechu, ye’l propiu topónimu el que define xeolóxicamente de manera precisa cada llugar: El Pozu’l Ramu ye un pozu y La Cueva la Cerezal ye una cueva. 

Desconozo porqué se popularizó’l nome erróneu. Quiciabes tien que ver con que La Cueva la Cerezal yera un espaciu menos popular y nun yera un topónimu mui sonáu. Por embargu, El Pozu’l Ramu tenía más presencia nel pueblu ya que cumplía función de vertederu, amás de tar pegáu al camín. Llegaron a face-y una muria pa llendar a los animales. 

Consulté daqué de la bibliografía publicada sobre la cueva y en varies ocasiones (Berenguer, 1985; Moure, 1992; Balbín, 2022) citen corréutamente el llugar como Cueva la Cerezal. Sicasí, la mayoría de publicaciones, la prensa, los documentos oficiales, el Centru d’Arte Rupestre Tito Bustillo y en resume, les comunicaciones públiques o privaes, siguen usando erróneamente’l topónimu Pozu’l Ramu.

Toi empeñáu en tratar de recuperar esti detalle porque siento, qu’una vez más, esto asocede por nun preguntar a la xente del llugar, por nun tar atentos al conocimientu popular, por pensar qu’eso nun tien valor. Por ello, dexo equí estos apuntes por si daquién tien a bien tenelos en cuenta.