A mediaos del sieglu pasáu un rapaz metióse per una cueva. Pisó’l suelu arenosu del fondu dempués de dir destrepando como bien pudo la pendiente qu’había na entrada. Nun se sabe cuántu tiempu tuvo, nin cuántu percorrió. El casu ye que dexó’l rastru del so pasu con un dibuxu a llapiceru na paré: un páxaru y les sos iniciales C. P. F.

Cesáreo Pérez Fernández quiciabes nunca nun viera les pintures rupestres que taben a pocos metros del llugar onde ficiera él el so dibuxu. O quiciabes sí y nunca nun-y lo contara a naide. (Préstame imaxinar que les viera, que pensara que yeren un suañu o daqué máxicu y como non lu diben creyer, que lo guardara na so memoria pa siempres).

Pocos años más tarde, nesi mesmu llugar, miembros del Grupu Torreblanca y dos vecinos del pueblu descubren unes pintures prehistóriques na Cueva la Cerezal, güei Tito Bustillo. Dalgunes de les caberes representaciones paleolítiques (la famosa cabeza de caballu, por exemplu) sepárense del páxaru de Cesáreo unos 12.000 años y unos pocos metros. Por embargu, nun se diferencien tantu pente elles. Apaez la firma, eso sí: naciera l’autoría. O quiciabes non, y los anteriores tamién tan firmaes pero nun sabemos interpretalo. Desconocemos que queríen cuntar aquella xente, tamién lo que quería cuntar Cesáreo. En cualesquier casu, representaben lo que teníen delantre.